XexeX's Blog

高清組合

XexeX — Tue, 12 Aug 2008 15:01:11 GMT

為o左睇奧運，一個月前待登去買o左高清電視，開頭仲驚我住o個棟大廈會收唔倒，又驚之前有線電視條天線睇唔到高清，好彩最後都係睇到。

電視
原先諗住平平地買部三叔40吋就算，但諗o下諗o下，都係買部好少少，加上去電器鋪睇過，三叔除o左6系好o的之外，其他都麻麻都，所以左揀右揀，最後都買o左Sony X300，貪去有Motion Flow，o的色都算幾自然，不過個Spec就差o左o的，加上係上年o既Model，開頭都驚會唔會冇其他新Model咁靚，但肉眼睇過後，發現Spec呢樣o野真係唔好盡信，自己去電器鋪睇o下，覺得邊部靚就買邊部啦。
X300外型算係幾好，都幾日系機Feel。畫面有Motion Flow幫助，唔係太覺有鬼影，不過亞視新聞台o的字幕都會見到有殘像。除此之外，暫時都覺得部機好滿意。

機頂盒
曾經諗過買8仔，因為我多讚，但個樣唔係咁得，個Remote仲成個大陸DVD咁款，其實大部份機頂盒個Remote都唔係咁靚。而用得Sony電視，如果夾Sony機頂盒o既話可以一個Remote控制晒兩樣o野，而佢個樣仲係咁多機頂盒最靚。不過Sony機頂盒最大問題就係冇得錄影，而我就諗住會用電腦錄，所以問題唔大。但買o左之後先發現HDMI出唔倒5.1，呢個係我覺得比較唔方便o既地方，希望Sony遲o的會更新Firmware解決啦。
畫質方面，可能電器鋪用o左分線器，所以覺得屋企個畫面靚過晒大部份電器鋪Demo。轉台都算快，2~3秒就轉到台。

Amp
好少o係廳聽歌，所以唔諗住買咁靚聲，細細地出到5.1就得，睇戲有番o的現場效果就得。原先有諗過買個Amp，再搬房o個幾個喇叭出廳用，但見到Sony有幾套家庭影院組合都幾平，所以就去睇睇。
睇過高球主意，即細喇叭o個款，但試聽時覺得高音同低音完全分開，唔係咁掂，加上售價接近$5000，唔係咁值。再睇睇SF2300同SS2300，其實再隻Model個Amp係一樣，不過喇叭唔同，SF2300係高身喇叭，靚仔o的，原先都想買，不過個廳已經冇位擺，而兩者o係音質方面又好似冇乜分別，所以最後都買o左SS2300。
音質方面，都唔會有咩靚聲，不過叫做多個Subwoofer多o的低音，睇戲都OK，食到Dobly Digital 5.1，有時睇電視都會用得到。用o左5.1後，連阿媽都話好聲o左，因為o的聲可以o係後面喇叭出，聽得清楚o的… 要彈o既就係中間隻喇嘛雞o左o的。

電腦
本身都有部MCE電腦，不過之前用S-Video駁CRT，畫質都唔係咁掂，而家經HDMI駁LCD電視，可以話非常正。為o左可以經HDMI出聲，仲走去買o左張HD4850用，而家睇高清同打機都兼顧到，玩Winning出到1080p仲有5.1，真係好正。

而家電視，機頂盒同Amp都係用Sony，因為有Bravia Sync，可以一個掣就開晒所有設備，開Amp時，電視又會自動Mute聲，只係Amp出聲，當然電視/機頂盒個Remote可以控制埋音量啦。開機頂盒時，Amp又會自動將個訊號轉去SAT，真係少好多掣，亦都方便老人家操作。

星期五睇o左住奧運開幕禮，原本都冇諗會咁好睇，但出o黎o既效果真係意外地好，無線特登停o左兩個台，用18M頻寬o黎播高清，出o黎效果真係好靚。唔怪之得聽到人o地講：睇奧運開幕仲好過睇Mummy 3

私隱線

XexeX — Wed, 06 Aug 2008 06:43:00 GMT

成日都見人搭緊車時，好大聲咁講電話。我自己就好憎呢種行為，迫成車人聽你廣播，有時連聽MP3都聽唔倒，所以我而家買Headphone都會買入耳式，隔音好o的。

之前去日本，睇到日本人o係車箱入面只用SMS，唔會用電話通話，真係有o的佩服，唔知香港人幾時先識呢種禮儀？

作曲: 周博賢
編曲: 周博賢
填詞: 周博賢

眾搭客結集在列車艙一個個對坐有部份
渾沌睡眼空晃晃部份用辦法自娛埋藏
卻永遠發現著電話幫三個至四個坐附近
利用電話跟死黨漠視著大眾高聲傾講

股海怎麼翻波親戚怎麼囉唆
張添福朱小冰相戀的經過資料相當清楚
不想聽都不可心中開始起火
叔公身家幾多師姐專攻商科
擠迫車廂中私隱集體廣播
不需解釋清楚不想知這麼多只想專心聽歌

縱正向對著望露兇光他也懶理我似附近
是二萬呎的空房自在又愉快的講講講

股海怎麼翻波親戚怎麼囉唆張添福朱小冰相戀的經過
資料相當清楚不想聽都不可心中開始起火
叔公身家幾多師姐專攻商科擠迫車廂中私隱集體廣播
不需解釋清楚不想知這麼多只想專心聽歌

遠至世界大事亦不須於這裡散播更莫論
雜項事情沒有痛癢歸家收起再講可不可

出身怎麼坎坷想生位金叵羅
張添福朱小冰分手的經過資料相當清楚
不想聽都不可心中開始起火
車廂的CONFERENCE CALL
即使可泣可歌走開一點好嗎讓空間給我
不需解釋清楚不想知這麼多只想專心聽歌

私隱線 - 謝安琪 Kay Tse

Appcrash

XexeX — Tue, 29 Jul 2008 15:39:00 GMT

尋日忽然上唔倒網，手痕諗住用Windows o個網絡修復功能試試(即Right Click網絡連線)。點知修復完就仲衰，連開Firefox都出Error，話Appcrash錯誤，開MSN就自動關閉，又係Appcrash有問題，只得IE 64bit先上到網。上網睇o左成晚都搵唔倒解決方法，就咁成晚冇乜點真正上個網呀。

今日，終於都俾我搵到咩問題。原來係Winsock有事，所以開咩上網o既程式都會出Error。試試人手Reset Winsock後，終於都OK番，而家上得網呀。

如果有朋友用緊x64 Vista，試過我咁o既情況，可以試試用Admin執行CMD，輸入"netsh winsock reset"，咁就得呀

天降咸書

XexeX — Sat, 19 Jul 2008 15:25:30 GMT

記得以前，巴士仲係熱狗o個陣，好多時我都會坐巴士上層。當巴士埋站時，有時會見到巴士站上蓋有o的成人雜誌o係上面，有o的仲唔知放o左o係度幾耐，已經俾太陽晒到變晒色。

唔只巴士站，就算已前行行下街，都會見到有好心人將o的咸書一頁一頁咁撕落街，都幾壯觀。我就試個o係中學見到有幾頁飄o左o黎我o地學校，當時真係好哄動。

唔知點解，呢幾年已經好少見到天降咸書。雖然話而家互聯網發達，大部份人都上網睇相成分享相片(分享只限朋友)，但我見個街都仲有好多咸書，由傳統o既蛇貓狗，到介紹夜晚去邊o既「夜x王」，及「Friday周刊」，咸書數量一o的都冇少到，點知而家冇好心人撕o的咸書落街？

辭工‧新工

XexeX — Sun, 13 Jul 2008 04:19:37 GMT

7月，離開o左做o左6年o既城大，經過幾日唔使返工o既日子，上星期三o係新工司上班。

唔少朋友問我點解離開城大，話晒大機構，福利又好。但亦唔少離開城大o既同事知道，城大其實都唔係想象中咁好。

好唔好我唔o係度比較呀，始終因人而言。我離開城大o既主要原因，係因為對某o的事同人感到心淡。其實一直都對某o的做法唔係咁認同，但無奈呢o的做法又好適合我o地Department風格，於是乎，做10倍功夫，都冇1倍成效，你話灰唔灰。最後，正如我一直所講，你係得呢度做就要接受，唔可以抱怨，除非你選擇離開，所以，我就離開o左工作6年o既城市大學。

新公司規模比舊公司有好大出入，不過第一日返工已經令我有返私人公司o既感覺，呢種感覺幾良好。而我個位終於都似番個位，電話亦唔使同人Share，工作環境比之前好。但因為剛上手，好多o野都未Handle，搞到上星期唔係太多o野做，唔係太喜歡咁閒，希望o黎緊可以多番o的o野做，可以搏殺o下啦。

(短暫o既整潔)

(我個位差唔多係以前o既Double呀，咁樣做o野都爽o的啦)

圍。城

XexeX — Tue, 08 Jul 2008 14:17:24 GMT

又是一套圍繞天水圍問題的電影，故事不算特出，只是將連串悲劇交織成一套電影。報紙上那些獸父、二奶倫常家庭悲劇，惡勢力入侵校園，青少年吸毒等等問題，都可以在電影中找到。但電影影大部份時間只圍繞5位問題青年及其家人，沒有特別描寫其他人的睇法，對社會整體影響，感覺上只是一般問題青年電影，有點似以前的看過的「無人駕駛」及「惡勢力」。

電影不算太好睇，那些所謂社會問題也早已報導過，電影中也找不到解決問題。

我不是居住於天水圍，不知問題是否如電影所講那麼嚴重。以上問題，相信並不只天水團有機會發生，屯門會，東涌會，甚至將軍澳都會。

可能戲名叫「圍城」，所以電影內也特顯一班青年孤立無助的情況，如學校被欺負沒有人幫手，被父親侵犯是姐姐只會啞忍等等，所有人只會處理自己的事，看見別人需要幫助，總是不會出手。

天水圍某部份家庭生活質素差，我或多或少會認同，但對比60年代香港，是否真的太差？如果60年的的香港發生以上問題，今日的香港又會變成點？

看完整齣電影，發現戲入面所有問題都有一個共通點，就是所有問題根源都是「人」。

騎呢團

XexeX — Thu, 26 Jun 2008 14:46:52 GMT

我叫做XexeX，雖然冇X-Japan咁型，但起碼出街唔會因為個樣衰到唔打唔得咁o丫，但是近俾我見到有個組合居然用個X字，但…

o拿，唔係呃你o地呀，真係要幾騎呢，有幾騎呢，連人o地冇o既，佢o地都俾到你。

呢班「X」叫做「台灣新柒少 Χ型男團體」，真係人如其名。

醒多張Poster俾大家，可以Print出o黎貼o係夾萬出面，保證冇人敢偷！

P.S.% 如果以上內容令大家不安的話，請告知在下，定必短期內刪除。

Eason Chan Get A Life Blu-Ray

XexeX — Fri, 20 Jun 2008 17:15:40 GMT

本身已經買o左Eason Chan - Get A Life演唱會DVD，o個時佢話用高清錄製，睇DVD時已經覺得好靚，但今次睇埋Blu-Ray版，即該覺得DVD都係不外如是，真係一山還有一山高。

Blu-Ray版用1080p播放，連Eason o的瘡都睇得好清楚，都幾恐怖，唔怪之得真係有化妝品係專For高清節目用。

零八關西之回程篇

XexeX — Wed, 18 Jun 2008 13:30:55 GMT

今日原定11點Check Out，不過浸完溫泉後先睇到11:23有JR特急，如果錯過o左呢班就要等一個鐘，所以我o地o拿o拿聲執行李。不過離開前發生o左o的小問題，搞到11:10先走得，所以都係趕唔倒班車。

天山閣雖然係遍遠o左o的，不過宿客去同走o個程都有免費車，我o地走o個程車仲送到我o地去白濱車站，如果搭的士都要過百港錢o架，真係好Service。由於遲走，所以我o地去到車站都成11:30，班車已經走o左，不過可以慢慢o黎，首先雞同鴨講咁同個售票員買車飛，佢o地又係唔識英文o架，不過就預備好o晒o的寫o左英文o既紙仔，好似英文考試咁，睇下咩情況要用番咩句字去作答，好搞笑。好不容易先買到車飛，我o地呢一程豪o左，搭特急o既指定席，即係Reserved Seat，話o晒今程都係最後一次搭JR，豪o的都冇所謂啦。o係指定席o既車箱入面，係有服務員推車賣o野，不過o的o野食就好鬼，我見有對老婦夫買o左盒便當，拎o左幾張1,000出o黎，我諗盒便當可能要3,000，真係貴得厲害。

(白濱站)

(特急指定席車箱)

(我o地搭o既特急)

由白濱去關西空港，要分別o係和歌山同日根野站轉車。轉o左兩程車後，差唔多3點先去到機場，先去ANA Counter放低行李，兩件行李o既托管費要1,200，之後就諗住坐100 Bus去Runki Premium Outlet，點知去到車站先知過o左3:00班車，之後o個班要3:55，成個鐘呀大佬，點等呀，奇怪網上o的人冇講過呢樣o野。於是乎，我o地唯有搭多程JR去Runki Outlet站，再行15分鐘過去。去到Outlet站，見到傳聞中閘內o既Locker，不過真係好細，我諗最細Size o既行李箱先放得入。因為時間好趕，沿途又唔係太多指示，所以出o左車站都幾驚行錯路，好彩我o地行條路都係o岩o既，不過由車站行過去Outlet真係要15分鐘，所以回程又要預番時間呀。去到Outlet，計過得番一個時間Shopping，即刻睇睇水牌有咩o岩買先，我就諗住買Polo Shirt，小芬就多o野買o的。經過一輪掃蕩之後，小芬收獲唔錯，而我就只係買o左件Tommy衫，唔夠喉，好知前幾日o大阪買多o的o野啦！

(要o係和歌山轉車)

(Outlet站)

(Runki Premium Outlet)

(Runki Premium Outlet水牌，唔知會唔會成日轉呢？)

返到機場，拎番行李後開始覺得肚餓，鬼咩，食完早餐之後成日都冇食過o野。心諗如果唔食o野，下一餐要就係食飛機餐，Holy ***！但周圍又冇乜好食，所以決定入o左閘再搵，入闡後，我o地仲有30分鐘就要上機，睇o黎都唔可以坐低食，雖然小芬想去其中一間睇下有冇外賣，但因為唔知佢o地要整幾耐，所以最後都冇食到。最後去o左星巴克買Dry卷，件卷得好少肉，其他都係蔬菜，非常之Dry，不過肚餓就食咩都好味啦。

(去Star_uck買Dry卷)

我o地登機o既Gateway又係要搭無人駕駛先去到，我同小芬初時都睇到係Gateway 3登機，但架無人駕駛就真係一個人都冇，之後睇番機票，原來係Gateway 4至真，所以又要搭番轉頭，搭另一架車去Gateway 4，點解我同小芬都會睇錯係Gateway 3 o既？

(無人搭o既無人駕駛)

去到Gateway已經見人上緊機，我o地都去排隊。前兩晚係心齋橋Confort網上Check In，已經揀好o左位，今位個位都係望到機翼，不過就後些少，可以睇多o的風景。

(要離開關西呀)

上到機，我o地個邊係由一位空中少爺負責，少爺佢會選擇性咁服待乘客，o係機上面o個3個鐘頭仲用o左好多時間同另一位空姐溝通溝通，今時今日仲有o的咁o既服務真係難得。至於個飛機餐，都係照樣OK難食，好彩之前食o左個Dry卷，唔係就慘呀。

(又係難食o既飛機餐)

3個鐘頭後，望到香港機場，真係好懷念o係關西o個6日，唔係咁想返o黎香港住。當我o地落機等行李時，我o地見到張柏芝、BB、佢細佬同佢細佬班Friend，張柏芝仲帶晒黑超同口罩驚人認得佢o添。不過好多人一睇就認得出佢，究竟副超同個口罩有咩用呢？

搭巴士回程途中，坐我o地後面o個位阿叔無停過咁發表佢o既偉論，仲夾雜o左o的粗口，最後我都頂唔住要同佢傾兩句。其實我好憎人車箱入面大聲講o野同傾電話，好心學o下日本人，o係車箱入面唔好咁大聲迫人聽你講o野啦。唉，真係好懷念日本，想再去多次。

~ 零八關西之旅完 ~

零八關西之溫泉旅館篇

XexeX — Wed, 11 Jun 2008 03:32:41 GMT

今次旅行o既重點之一，就係我o地今日會住o既白濱溫泉旅館 - 天山閣海遊庭。呢個亦都係我o地最貴o既一晚房租，因為旅館設有私人風呂，可以o係私人空間入面，一面浸溫泉，一邊欣賞白濱景色，不過就Double價錢。

由千壘敷返到旅館都成6點幾，職員亦都將我o地o既行李擺o左入房，真係好Service。入到房，同我之前上網睇o既差唔多，係和風房，不過就俾想象中大，同現代化。未去之前，我其實都幾擔心會唔會冇廁所，因為我睇過漫畫，有o的溫泉旅館係要共用廁所o既。但我o地間房唔止有廁所，仲要分開沖涼、洗手化妝、同解手三個Area，沖涼o既地方唔會見到坐廁，幾Grant呀。另外，入房前係要o係玄關要除鞋先，因為房入面鋪o左Tatami，唔除鞋就會整污蹧呀。房中間有張檯，如果訓覺時係要搬開佢再鋪床單o既，上次去御溫泉都試過。

(和式房，房間比想象中大，設備都唔差)

(沖涼o既地方同化妝間分開)

因為我o地唔識講日文，所以旅館派o左位中國人Service我o地，呢位小姐性劉，我諗廿歲左右，識講國語同日文。我同小芬日文都唔掂，但小芬國語就OK，所以大部份溝通都要靠小芬。入到房後，劉小姐講解一o下房間設備，雖然我國語麻麻，但都聽得明o既。佢又有講個私人風呂點用，點調節水溫等等，都幾細心呀，溫泉旅館o既服務真係冇得頂。

(浸溫泉前要沖一沖身，原來溫泉旅館俾我o地用我o的洗頭水同液係勁o既)

(由房間望出去，景色唔錯，右手邊係私人風呂，唔用時要搵o野蓋住，唔好影響水質)

劉小姐走後，因為之前被兩淋過，所以我o地就沖一沖身同換上浴衣，仲有沖茶飲，真係好寫意。Hea o左一陣，差唔多到晚飯時間，就出出面食飯，由於我o地係住私人風呂，所以被安裝到獨立房間進食。今餐係一餐非常豐富o既料理，雖然一早都知溫泉旅館o既料理會好正，但冇諗過會正成咁，唔講咁多，睇相啦。

(勁多o野食)

(龍蝦刺生)

(拖羅同唔知咩魚)

(不知名甜品)

(梅酒同不知名壽司)

(海膽同蒸蛋)

(鐵板和牛)

(不知明湯同甜品)

(料理Menu，好似去o左飲)

呢餐飯不斷食都食o左兩個鐘，食到我行唔郁咁濟，我諗如果剩係計呢餐，每個人都要HK$1000先得。食完晚飯後，就走返入房浸溫泉。入到房時，職員原來已經幫我o地搬o左張檯埋一邊，同鋪埋床單。私人風呂真係好正，完完全全一個私人空間，中意幾時浸都得，浸浸o下返入房睇電視又得，睇完再浸亦得。雖然話係私人風呂，但又有少少Open，可以睇到外面o既景色，真係好正。我o係北投都浸過私人風呂，但只係室內，同今次露天私人風呂好唔同，有機會要再浸多次！

(開始浸私人風呂呀，如果怕醜可以落簾)

(我就冇乜所謂，收剩一塊簾，睇o下外面景色，勁人生)

浸到咁上下，都差唔多要訓覺，因為夜晚白濱冇乜o野玩，當晚又落住毛毛雨，所以沖完涼Hea一陣就訓，情願聽朝早o的起身再浸。

第二朝，一早起身食早餐。呢個早餐又係勁豐富，雖然都冇尋晚o個個咁多o野食，不過以早餐o黎講就算好勁。好多o野食我都唔知咩o黎，不過就好好食，每樣o既食都好細碟，可以試好多o野。食定早餐後又返房Hea一陣，之後就到旅館附近o既溫泉公園行o下。

(早餐一o的都唔弱)

(九宮格)

(小芬唔食魚，改食蛋，不過要自己煎)

溫泉公園係由多個溫泉組成，入場費1,000，不過天山閣o既宿客可以免費入場。入面真係好多溫泉，起碼十幾個，可惜當日11點要Check Out，所以冇浸到，不過都有o係附近行o下。溫泉公園景色唔錯，落住雨o既時候俾到我一種好靜o既感覺，我自已好中意呢種感覺，冇其他人，聽唔倒人聲同車聲，只有好有節奏但又好細聲o既雨滴聲，同間唔中有風吹過樹葉o既聲音，好想留o係度唔走…

(溫泉公園入面有個不動明王o既神社)

(通住天山閣o既通道，亦係溫泉公國o既入口)

(紅橋，o係度睇日落好正呀，不過落雨…)

(由紅橋升降機望返溫泉公園)

(由紅橋望返天山閣海遊館)

(好中意呢o的環境，可以靜靜咁散步)

(終於俾我見到風呂o既入口，同睇漫畫一樣，一邊男一邊女)

(溫泉公園地圖，都幾大)

返到房，爭取時間再浸多次溫泉。今次都浸o左好耐，仲一邊聽歌，一邊望住白濱o既海，又係浸到唔願走，勁寫意。

(浸溫泉時望出去o既風景)

(大解放！)

今次住溫泉旅館雖然好貴，但付出絕對有番同等享受，相反，如果冇o黎過既話，我驚我反而會後悔。如果大家俾得起錢，又未試過o既話，一定要試試。