上個星期因朋友結婚關系，上o左大陸食飯 + 卡拉OK。雖然餐飯真係酒微菜薄o左o的，我o地食剩好多o野，食完之後都仲好肚餓，不過大家都知道主人家心意，所以都依舊食得開心。
晚飯過後，一大班人就去唱卡拉OK。我自己就好少o向大陸唱K，今次都可以見識o下國內卡拉OK係點樣。我o地去o個間卡拉OK都算好大，成層樓都係，大過Neway City。經過走廊時，唔知點解間間房都開住燈，仲要幾光o下，o向出面可以好清楚咁睇到裡面咩環境，呢個情況同香港有o的唔同。我地由於有成20+人去唱，所以有間大房，應該都有接近3~400尺，好大。點歌係用Touch Screen，都幾大個Panel(真係乜都好大)，歌曲方面都算新，不過搵唔倒Juno，冇得唱Poor U。o個晚由於大部份人都好似我咁上下年紀，屬於老餅，所以都唱o左好多舊歌，連張學友、Beyond都有得唱。唔唱K的話，就圍埋猜o下枚，玩o下失蹤，飲o下酒，女仔就玩NDS。
大約唱到4點鐘，大家都覺得夠皮就埋單走人，張單又係主人家俾，多謝晒。之後就經皇岡坐大巴返歸。
星期日訓到1點左右，熱醒o左，個天好似話俾我知，今日一定要去沙灘游水。由於星期六o向大陸，有個朋友打o黎o既未接來電，所以打返俾佢問咩事。原來佢原本想約星期日去沙灘玩，不過聽倒電話響聲知道我唔o向香港，所以冇約倒。咁我話不如而家約人睇下去唔去成啦，於是就各自約人。不過，我有o的朋友真係唔係咁鍾意去沙灘，約佢時佢話今日太熱，唔去得沙灘…乜熱唔係更加應該去沙灘消暑咩？
最後，大家都約唔倒人，我就提議兩個人都照去。咁我o地一行兩個人咁大把，3點半鐘出發去比較近o既大清。由於下午去，所以都唔係太多人等車，4點左右已經去到大清，不過個灘都係好多人。我地將貴重物品存放o向士多(Total收費$40，搶錢)，好快就落水呀。夏日炎炎浸o向水入面真係好爽，不過由於浮台實在太多人，所以都冇游出去，加上朋友又唔係咁識游水，所以我都只係o向防鯊網同浮波附近游(o個度比較少人)。游到六點，由於士多收工，所以要返上岸拎o野走人。呢段時間照例到係好多人走，排隊等沖身都用o左15分鐘，不過男人o個邊好快，我又用o左15分鐘沖涼 + 換衫，7點唔使就可以走人。
之後大家都好肚餓，友人提議食韓燒，我自己都好耐冇食過(去完韓國之後都冇食過韓國o野)，所以就出觀塘食，仲約倒FD + FD's老婆一齊食添。最後，大家都食到好飽(唉，有冇得減肥)就歸家。
P.S% 原來星期六晚我飲o左4種酒：紅酒 + 40度白酒(好似火酒咁) + 芝華士 + 大陸啤酒 ~