上星期連續放3日假，原本諗住星期五入長洲睇搶飽山，但係因為下午打波，Be有唔舒服，所以最終都冇去到。
星期六朝早睇新聞，得知原來下午仲會有一次飄色睇，咁就o拿o拿聲執齊o野飛入長洲睇啦。
樓下有巴士30分鐘唔使就到碼頭，不過好可惜到碼頭時剛剛開o左班快船，仲要係睇住走，咁雖有等1:15班慢船啦。雖然知道會趕唔砌2:00入長洲，不過慢船o既船尾可以曬o下太陽，感受o下海風，都唔係話唔好o既。
船大約2:10到碼頭，飄色都唔係開始o左好耐，不過警察封路，好難搵到位睇飄色。勁走o左一段路，終於搵到個唔係咁得o既位呀，冇計啦，好過冇得睇。由於當日氣溫都幾高，加上大部份人都係著背心，個個成身汗咁推來推去，仲要勁大汗味，都幾難頂。
![]()
因為好多人都擔住把遮，隔住視線，所以都唔係睇得咁清楚。雖然飄名話係長洲特色，但又唔係咁感覺到有咩特別o既地方，都係好似一段巡遊咁，我見當中仲有人扮日本祭祀，唔知D公公婆婆睇到會點呢？
太約睇o左30分鐘就已經冇得睇呀，一埋o黎到冇理由就咁走啦，所以就去沙灘行o下，可惜自己一個人呀，唔係就可以曬o下太陽，游o下水，遲D一定要去海灘游水先得。之後洗個面，返番入大街，咁o岩撞到飄色隊伍回程。今次好過頭先好多，冇咩人迫，話咁易就影到相，又冇D汗男迫埋o黎，不過就好似少o左D熱鬧氣氛咁啦。由於少人，影D相都靚D。
一邊行一邊影，行到出海邊咁o岩又遇著表演完畢，工作人員話D包影完相可以取走，咁就成村人重演搶包山事件，好彩手快都搶到個包俾Be，Yeah~~
由海邊一直行去五行石，記得兩年前同朋友行去張保仔洞果時覺得幾遠，點解今次會咁快就到o既？可能冇乜影相掛，我估。行完五行石，經墳場果邊落番大街，再去北帝廟，途中撞到舊同事。北帝古廟感覺一D都唔古，我諗可能剛維修過，影o左幾帳相，去大街督o左2串o野食，飲o左支豆奶，之後就坐船出番中環。
唔知好彩定唔好彩，今次又係坐慢船，不過I Like It，又唔係趕時間，坐慢船幾寫意呀。番到中環又唔係咁想番屋企住，心血來朝想入屯門行o下，話曬都o向入面hea過兩年，有D成情o架。等巴士期間又遇到舊同學，真係好耐冇見。入到屯門，都係行o下市中心同置樂，其他地方唔係咁熟路，之後去o左紅樹林食Dinner，D o野麻麻，食完搭巴士返歸呀。