同一般細路一樣，在下讀書果陣經常會去機鋪浦。記得以前o既機鋪係冇分成人場同小童場，可能有分，但D人都好少理，o向找錢個Counter仲有D牛皮膠紙放o向度俾人遮住個校章，幾體貼呀。而我屋企都好放便，樓下無遠就有間機鋪，所以果時一放學做晒功課就會落去同班同學仔落去切磋一下。

小學初期o既機鋪冇乜o野玩，o黎o黎去去都係打飛機、波子機同麻雀。通常我都會玩“火鳳凰“；玩者架飛機可以合體Power Up，雖然今時會日好似好單調，但果時確實係一隻唔錯o既Game，點都好過仲玩蒼蠅機同撞磚o丫。

到o左小學3、4年級，機鋪D Game就好玩好多呀，有雙截龍、魂斗羅、沙羅曼蛇同泡泡龍等，好多Game日後都成為o左經典，果時真係差唔多日日都落去玩返一兩鋪。

到o左小學後期，機鋪出現o左一隻好多人玩o既對打格鬥遊戲 - Street Fighter一代，玩者要輸入指令，遊戲色色就會出D必殺機如波動拳、昇龍拳及旋風腿。果時呢隻Game都幾多人玩，好多人為o左練得一身好武功，不惜大灑金錢煲機，係咁入錢，而當時一局大慨$2，都算幾貴，不過貴還貴，都不愁無生意呀。其本上呢隻Game只要不停出昇同出波(即昇龍拳及波動拳)就會贏，冇乜戰術可言，但對遊戲界而言，Street Fighter係一個新突破，不但創出“輸入指令出招“o既玩法，仲令到出波(飛行道具)普及化，搞倒而家差唔多隻隻格鬥Game都係“波、昇“。